​​​​​               ម៉ាកយីហោ Zeekr របស់ក្រុមហ៊ុន Geely បានប្រកាសជាផ្លូវការថា រថយន្ត Zeekr 009 ស៊េរីអាប់ដេតថ្មី នឹងត្រូវដាក់សម្ពោធនៅថ្ងៃទី 19 ខែឧសភាខាងមុខនេះ។ រថយន្ត MPV កម្រិតខ្ពស់នេះ ធ្លាប់បានបង្ហាញខ្លួននៅក្នុងឯកសារចុះបញ្ជីកាលពីខែមីនា និងបានបើកឱ្យកក់ទុកមុនក្នុងពិព័រណ៍រថយន្តក្រុងប៉េកាំង ដោយមានជម្រើសបីប្រភេទគឺ៖ ស៊េរី 7 កៅអី Ultra, ស៊េរី 7 កៅអី Ultra+ Qijia និងស៊េរី 6 កៅអី Ultra+ Executive។

ការកែលម្អផ្នែកខាងក្នុង

ទោះបីជារូបរាងខាងក្រៅនៅរក្សារចនាបថដដែល ប៉ុន្តែកាប៊ីនខាងក្នុងមានការផ្លាស់ប្តូរថ្មីដូចជា ចង្កូតរចនាឡើងវិញ និងប៊ូតុងបញ្ជាបែបគ្រីស្តាល់ (crystal rotary knob) នៅផ្នែកកុងសូលកណ្តាល។ គ្រឿងបរិក្ខារស្តង់ដាររួមមាន ការកែសម្រួលកៅអីដោយអគ្គិសនីច្រើនទម្រង់ ប្រព័ន្ធខ្យល់ចេញចូល និងប្រព័ន្ធកម្ដៅសម្រាប់គ្រប់កៅអីទាំងអស់។

កៅអីជួរទីពីរឥឡូវនេះផ្តល់ជូននូវកៅអីប្រភេទ Zero-gravity ភ្លោះ ដែលបំពាក់ដោយមុខងារម៉ាស្សា និងច្របាច់ដល់ទៅ 22 ចំណុច។ សម្រាប់កំណែ 7 កៅអី កៅអីជួរទីពីរអាចបង្វិលបាន ហើយមានបំពាក់អេក្រង់ OLED ទំហំ 17 អ៊ីញ នៅលើដំបូលឡានផងដែរ។

ភាពឆ្លាតវៃ និងសុវត្ថិភាព

Zeekr 009 ថ្មី ដំណើរការដោយឈីប Thor-U ដែលមានកម្លាំងគណនាដល់ទៅ 700 TOPS។ វាមកជាមួយប្រព័ន្ធជំនួយការបើកបរ H7G-ASD ជាស្តង់ដារ និងផ្តល់ជូននូវមុខងារសុវត្ថិភាពសកម្ម (active safety) ជាង 70 មុខ។

សមត្ថភាព និងការសាកថ្ម

កំណែម៉ូទ័រភ្លោះរបស់ Zeekr 009 ថ្មី ត្រូវបានតម្លើងទៅជាប្រព័ន្ធអគ្គិសនីកម្លាំងខ្លាំង 900V និងប្រើប្រាស់អាគុយ 6C Qilin ពីក្រុមហ៊ុន CATL។

ប្រព័ន្ធថាមពល និងចម្ងាយបើកបរ៖

• ប្រភេទម៉ូទ័រទោល៖ កម្លាំងអតិបរមា 310 kW (416 សេះ) ស្ទុះពី ០ ដល់ 100គីឡូម៉ែត្រ/ម៉ោង ក្នុងរយៈពេល 6.9 វិនាទី និងបើកបរបានចម្ងាយ 740 គីឡូម៉ែត្រ។
• ប្រភេទម៉ូទ័រភ្លោះ៖ កម្លាំងអតិបរមា 680 kW (912 សេះ) ស្ទុះពី 0 ដល់ 100 គីឡូម៉ែត្រ/ម៉ោង ក្នុងរយៈពេលត្រឹមតែ 3.9 វិនាទី និងបើកបរបានចម្ងាយ 720 គីឡូម៉ែត្រ។

ប្រសិទ្ធភាពនៃការសាកថ្ម៖

• ប្រភេទម៉ូទ័រទោល៖ សាកពី 10% ទៅ 80% ចំណាយពេល 0.19 ម៉ោង (ប្រហែល 11នាទី)។
• ប្រភេទម៉ូទ័រភ្លោះ៖ សាកពី 10% ទៅ 80% ចំណាយពេលត្រឹមតែ 0.17 ម៉ោង (ប្រហែល 10 នាទី)។

ប្រព័ន្ធជើងក្រោម៖ រថយន្តនេះបំពាក់ដោយប្រព័ន្ធបូមខ្យល់ (air suspension) ប្រភេទ dual-chamber និងបូមអេឡិចត្រូម៉ាញ៉េទិច CCD dual-valve ដើម្បីបង្កើនភាពរលូន និងផាសុកភាពក្នុងការបើកបរ។

ស្ថានភាពលក់របស់ Zeekr 009 ក្នុងប្រទេសចិន

នៅក្នុងប្រទេសចិន ការលក់ប្រចាំខែរបស់ Zeekr 009 គឺមានចំនួនប្រហែល 1,000 គ្រឿងកាលពីឆ្នាំមុន ប៉ុន្តែបានធ្លាក់ចុះមកក្រោម 1,000 គ្រឿងវិញនៅក្នុងឆ្នាំនេះ បើទោះបីជាធ្លាប់ហក់ឡើងខ្ពស់ដល់ 4,201 គ្រឿង កាលពីខែវិច្ឆិកា ឆ្នាំ 2024 ក៏ដោយ។