​​​​​​​​​           សម្រាប់ការចាប់ផ្ដើមឆ្នាំ 2026 នេះ ម៉ូដែល Kawasaki Stockman ដែលមានរូបរាងរឹង មាំមហិមានេះប្រហែលជាមិនមែនជាអ្វីដែលយើងរំពឹងទុកពីក្រុមហ៊ុនជប៉ុនមួយនេះឡើយ។ ម៉ូតូថ្មីនេះត្រូវបានរចនាឡើងជាពិសេសសម្រាប់កសិករ ឬ​អ្នកចិញ្ចឹមសត្វ និងការងារ ស្រដៀងៗគ្នា ប៉ុន្តែវាគួរឱ្យស្តាយសម្រាប់យើង វានឹងមានលក់តែនៅក្នុងប្រទេសអូស្ត្រាលី និងនូវែលសេឡង់ប៉ុណ្ណោះ។ នៅក្រោមតួខ្លួនដ៏បង្រួមរបស់វា គឺជាម៉ាស៊ីនស៊ីឡាំងតែមួយ កម្លាំង 233cc ត្រជាក់ដោយខ្យល់ ដែលផលិតកម្លាំងបាន 14 គីឡូវ៉ាត់ (18.7 សេះ) @7,600rpm និងកម្លាំងបង្វិល 14.7 ផោន-ហ្វីត (Ib-ft) (20N.m) @6,100rpm។ ម៉ាស៊ីនដែលប្រើប្រាស់ប្រព័ន្ធចាក់ប្រេងអេឡិចត្រូនិចនេះ ត្រូវបានផ្គូផ្គងជាមួយប្រអប់លេខដៃ 6 វគ្គល្បឿន។

ទោះបីជាវាមានរូបរាងខាងក្រៅសាមញ្ញ និងរឹងមាំក៏ដោយ ក៏ Stockman មកជាមួយនូវមុខងារ​គួរឱ្យចាប់អារម្មណ៍មួយចំនួន។ មុខងារមួយក្នុងចំណោមមុខងារទាំងនោះគឺ យន្តការចាក់សោ​ដងអំប្រ៊ីយ៉ា (clutch lever locking mechanism) ដែលអនុញ្ញាតឱ្យអ្នកជិះអាចបញ្ឈប់ម៉ូតូទាំង​កំពុងចូលលេខ ដោយមិនចាំបាច់ច្របាច់ដៃអំប្រ៊ីយ៉ា។ ម៉ូតូថ្មីនេះក៏ទទួលបានរបាំងការពារដៃ​ដែលផលិតពីអាលុយមីញ៉ូម ដែលជាការបន្ថែមដ៏ល្អសម្រាប់ការជិះកាត់តំបន់ដែលមានរបង ឬមែកឈើលយមកទាបៗ។ Rack ដាក់ឥវ៉ាន់ផ្នែកខាងក្រោយត្រូវបានរួមបញ្ចូលមក​ជា​ស្តង់ដារ ព្រមទាំងមានរបាំងការពារជុំវិញម៉ាស៊ីនផងដែរ។

ប្រព័ន្ធព្យួរ (បូម) ខាងមុខគឺជាប្រភេទ​ telescopic forks ទូទៅ ទំហំ 37mm ខណៈផ្នែកខាង ក្រោយប្រើប្រាស់បូមទោល monoshock ដែលអាចលៃតម្រូវកម្រិតភាពតឹង (preload) បាន។ ម៉ូតូនេះបំពាក់កង់មុខទំហំ 21 អ៊ីញ និងកង់ក្រោយ 18 អ៊ីញ ខណៈដែលប្រព័ន្ធហ្វ្រាំង គឺជា​ហ្វ្រាំងឌីសទាំងមុខនិងក្រោយ។ កម្រិតបូមមុខអាចរលោះឡើងចុះបានប្រវែង 158mm ចំណែក​បូមក្រោយអាចរលោះឡើងចុះរបានវែងជាងបន្តិចគឺ 168mm។

ជាមួយគ្នានេះដែរ Stockman មានទម្ងន់ប៉ាន់ស្មាន 130 គីឡូក្រាម កម្ពស់កៅអី 845mm និងកម្ពស់បាតត្រឹមតែ 220mm។ ធុងសាំងអាចផ្ទុកឥន្ធនៈបានរហូតដល់ 7.5 លីត្រ៕