អត្ថបទមុន៖​ក្រុមហ៊ុន BYD កំពុងគ្រោងចូលរួមប្រកួត Formula 1 ដើម្បីប្រជែងជាមួយ Ferrari និង McLaren   

​​​​​​​                 BYD ដាក់សម្ពោធរថយន្តអគ្គិសនី Supercar ម៉ូដែល U9       

                យោងតាមការចុះផ្សាយរបស់ IThome ក្រុមហ៊ុន BYD បានបញ្ជាក់ថា ខ្លួនកំពុងពិចារណាលើតួនាទីដែលអាចកើតមានក្នុងកម្មវិធីប្រណាំងរថយន្ត Formula 1 (F1) ដោយអនុប្រធានប្រតិបត្តិលោកស្រី Li Ke បានលើកឡើងថា ការពិភាក្សាជាមួយថ្នាក់ដឹកនាំ Formula 1 កំពុងបន្តប្រព្រឹត្តទៅ។

លោកស្រី Li Ke បានបញ្ជាក់ថា ក្រុមហ៊ុនបានទាក់ទងជាមួយថ្នាក់ដឹកនាំ Formula 1 រួមទាំងមានជំនួបជាមួយនាយកប្រតិបត្តិលោក Stefano Domenicali នៅទីក្រុងស៊ាងហៃផងដែរ។ ទោះជាយ៉ាងណាក៏ដោយ មិនទាន់មានការសម្រេចចិត្តជាផ្លូវការ ឬការកំណត់ពេលវេលាច្បាស់លាស់ណាមួយត្រូវបានប្រកាសនៅឡើយទេ។

តួនាទីជាច្រើនដែលកំពុងស្ថិតក្នុងការពិចារណា

លោកស្រី Li Ke បានបញ្ជាក់ថា BYD កំពុងពិនិត្យមើលលទ្ធភាពមួយចំនួនក្នុងកម្មវិធី Formula 1 រួមមាន៖

• ការចូលរួមជាក្រុមប្រណាំងផ្ទាល់ (Team entrant)
• ការផ្គត់ផ្គង់គ្រឿងបង្គុំសម្រាប់ម៉ាស៊ីន Hybrid (Hybrid powertrain components)
• ឬការចូលរួមតាមរយៈការធ្វើជាអ្នកឧបត្ថម្ភ (Sponsorship)

វិធីសាស្រ្តដ៏បត់បែននេះបង្ហាញថា ក្រុមហ៊ុនកំពុងចាត់ទុក Formula 1 មិនត្រឹមតែជាឧបករណ៍សម្រាប់ពង្រឹងម៉ាកយីហោប៉ុណ្ណោះទេ ប៉ុន្តែថែមទាំងជាបរិយាកាសសម្រាប់តេស្តសាកល្បងផ្នែកវិស្វកម្ម និងប្រព័ន្ធបច្ចេកវិទ្យាទៀតផង។

ការផ្លាស់ប្តូរបទបញ្ជាឆ្នាំ 2026 បង្កើនភាពពាក់ព័ន្ធផ្នែកបច្ចេកវិទ្យា

វដ្តនៃបទបញ្ជាថ្មីរបស់ Formula 1 ឆ្នាំ 2026 នឹងបង្កើនការប្រើប្រាស់ថាមពលអគ្គិសនីនៅក្នុងម៉ាស៊ីន Hybrid យ៉ាងខ្លាំង ដែលធ្វើឱ្យសមត្ថភាពរថយន្តកាន់តែពឹងផ្អែកលើប្រព័ន្ធស្តារ និងបញ្ចេញថាមពល។ ចំណុចនេះផ្តល់សារៈសំខាន់ខ្លាំងដល់ស្ថាបត្យកម្មប្រព័ន្ធបើកបរដោយអគ្គិសនី ដែលជាជំនាញស្នូលរបស់ BYD លើប្រព័ន្ធអាគុយ និងការរុញច្រានដោយអគ្គិសនី។

បរិបទឧស្សាហកម្ម និងទំហំក្រុមហ៊ុន

ជាប្រវត្តិសាស្ត្រ ក្រុមហ៊ុនផលិតរថយន្តតែងតែប្រើប្រាស់ Formula 1 ជាកន្លែងសម្រាប់អភិវឌ្ឍបច្ចេកវិទ្យាកម្រិតខ្ពស់ដែលមានតម្លៃថ្លៃ។ ការផ្លាស់ប្តូរបទបញ្ជាដែលជិតមកដល់នេះ ត្រូវបានគេមើលឃើញយ៉ាងទូលំទូលាយថា ជាការជំរុញភាពពាក់ព័ន្ធនៃបច្ចេកវិទ្យាអគ្គិសនីនៅក្នុងក្របខណ្ឌវិស្វកម្មនៃកីឡានេះ។

បច្ចុប្បន្ន BYD នៅតែជាក្រុមហ៊ុនផលិតរថយន្តអគ្គិសនី (EV) ធំបំផុតមួយក្នុងលោក ដោយលក់រថយន្តបានប្រហែល 4.6 លានគ្រឿងក្នុងឆ្នាំ 2025។ ទោះបីជាមានការប្រែប្រួលខ្លះៗក្នុងត្រីមាសទី 1 ឆ្នាំ 2026 (ចែកចាយបាន 688,939គ្រឿង ធ្លាក់ចុះ 30.5% ធៀបនឹងឆ្នាំមុន) ក៏ដោយ ក៏ក្រុមហ៊ុននៅតែបន្តពង្រីកឥទ្ធិពលរបស់ខ្លួន។

ការពង្រឹងសមត្ថភាពផ្នែកវិស្វកម្មល្បឿនលឿន

ទន្ទឹមនឹងការពិចារណាលើ F1 ក្រុមហ៊ុន BYD ក៏កំពុងពង្រីកផលិតផលដែលផ្តោតលើសមត្ថភាពខ្ពស់ផងដែរ ដូចជារថយន្ត Supercar Formula X (FCB) ដែលគ្រោងនឹងផលិតនៅឆ្នាំ ២2027 ដែលជាការបង្ហាញនូវបច្ចេកវិទ្យាវិស្វកម្មកម្រិតខ្ពស់របស់ប្រ៊េន។

ជារួម ការចូលរួមរបស់ BYD ក្នុង Formula 1 នៅតែស្ថិតក្នុងដំណាក់កាលពិចារណានៅឡើយ។ ការវាយតម្លៃរបស់ក្រុមហ៊ុនផ្តោតសំខាន់លើថាតើក្របខណ្ឌម៉ាស៊ីន Hybrid ឆ្នាំ 2026របស់ Formula 1 ស្របគ្នាទៅនឹងយុទ្ធសាស្ត្រអគ្គិសនីកម្ម និងវិស្វកម្មសមត្ថភាពខ្ពស់ក្នុងរយៈពេលវែងរបស់ខ្លួនដែរឬទេ៕